Kapitalpensjón úr Danmark
Tá ið donsk kapitalpensjón verður útgoldin til persónar við bústaði í Føroyum, kann viðkomandi persónur, undir ávísum treyum, fáa afturgoldið ein part av tí avgjaldi, sum verður eftirhildið í Danmark í sambandi við útgjaldingina.
Avgjaldið kann flytast til Føroyar
Tá ið kapitalpensjón verður útgoldin í Danmark, verða 40% av útgoldnu upphæddini eftirhildin í avgjaldi. Um kapitalpensjónin verður útgoldin í úrtíð, verða 60% eftirhildin í avgjaldi.
Um tílík kapitalpensjón verður útgoldin til persón, sum hevur bústað í Føroyum, skal avgjaldið býtast millum Føroyar og Danmark. Avgjaldið verður býtt í mun til tey tíðarskeið, sum persónurin hevur havt fulla skattskyldu í Danmark og Føroyum frá tí at pensjónin varð stovnað, og til hon verður útgoldin. Tann parturin av avgjaldinum, sum hoyrir til Føroyar, verður síðani fluttur til føroyska landskassan.
Henda skipan er bert galdandi fyri eingangsútgjøld frá donskum pensjónsskipanum. Aðrar pensjónir, sum verða útgoldnar við leypandi gjøldum, ella verða útgoldnar frá øðrum londum, koma ikki undir hesa skipan.
Partur av avgjaldi verður afturgoldið til persónar í Føroyum
Tá ið avgjaldið er flutt til landskassan í Føroyum, verður nýggj útrokning gjørd av avgjaldinum sambært føroyskum reglum. Eftir føroyskum reglum skulu persónar, sum útgangsstøði, gjalda 35% í avgjaldi av útgoldnari kapitalpensjón. Um pensjónin verður útgoldin í úrtíð, t.d. áðrenn 60 ára aldur, skulu 55% gjaldast í avgjaldi. Av tí at avgjaldið er lægri í Føroyum enn í Danmark, kann persónurin, sum oftast, fáa afturgoldið ein part av danska avgjaldinum í Føroyum.
Dømi 1: (alt avgjaldi í Danmark verður flutt til Føroyar)
Samlað virðið á kapitalpensjónini við útgjald 1.000.000
Avgjald, sum verður flutt til Føroyar 400.000
Netto útgjald til persón eftir avgjald í Danmark 600.000
Avgjald at flyta til landskassa í Føroyum 400.000
Roknað avgjald í Føroyum (1.000.000. * 35%) 350.000
Partur av avgjaldi at útgjalda til persónin 50.000
Um persónurin hevur havt bústað uttanlands ein part av tíðini, frá tí at pensjónsskipanin varð stovnað, og inntil hon verður útgoldin, kann hann fáa afturgoldið avgjaldið í Føroyum samsvarandi tað ella tey tíðarskeið, sum hann hevur havt bústað í Føroyum. Niðanfyri er víst dømi, har persónur, frá tí at pensjónsskipanin varð stovnað og til hon verður útgoldin, hevur búð helvtina av tíðini í Føroyum og helvtina av tíðini uttanlands.
Dømi 2: (helvtin av avgjaldinum verður flutt til Føroyar)
Samlað virðið á kapitalpensjónini við útgjald 1.000.000
Avgjald, sum verður flutt til Føroyar 400.000
Netto útgjald til persón eftir avgjald í Danmark 600.000
Avgjald at flyta til landskassa í Føroyum 200.000
Roknað avgjald í Føroyum (1.000.000 * 0,5 * 35%) 175.000
Partur av avgjaldi at útgjalda til persónin 25.000
Umsókn skal sendast til Toll- og Skattstovuna
Fyri at fáa part av avgjaldinum afturgoldið í Føroyum, skal persónur sjálvur senda umsókn til Toll- og Skattstovu Føroya. Saman við umsóknini skulu viðleggjast skjøl, sum innihalda hesar upplýsingar:
1 Samlaða virðið á pensjónini við útgjald
2 Goldið avgjald í Danmark
3 Dagfesting fyri nær ið pensjónin varð stovnað
4 Dagfesting fyri nær ið pensjónin er útgoldin í Danmark
5 Yvirlit frá Landsfólkayvirlitinum, sum vísir hvar persónurin
hevur havt bústað í tíðarskeiðnum frá stovnan av pensjónini
og til útgjalding.
Upplýsingarnar undir pkt. 1 til pkt. 4 standa sum oftast á eini uppgerð, sum persónurin fær frá antin tryggingarfelagnum ella skattamyndugleikunum í Danmark.
Um talan er um pensjón, sum er stovnað aftaná 1984, nýtist ikki at fáa bústaðaryvirlit frá Landsfólkayvirlitinum, av tí at Toll- og Skattstovan frammanundan hevur hesar upplýsingar í teirra EDV skipan.
Fleiri upplýsingar fáast við at venda sær til grannskoðaran, sum tú vanliga hevur samband við, ella
Mirjam Haraldsen
Tlf. nr. 34 34 70
mharaldsen@spekt.fo
Jákup Jacobsen
Tlf. nr. 34 34 63
jjacobsen@spekt.fo