Sjálvboðin MVG skráseting – útleiga av fastari ogn

Útleigari av fastari ogn skal søkja Toll- og Skattstovuna um loyvi til sjálvbodna mvg skráseting, um hann ynskir at fáa mvg afturgoldið av útreiðslum sum viðvíkja útleigaðu ognini.


Útleiga av fastari ogn – MVG frítt virksemi

Sambært meirvirðisgjaldslógini er útleigan av fastari ogn undantikið avgjaldsskyldu. Hetta merkir, at mvg ikki skal leggjast á leiguna í sambandi við útleigan av fastari ogn. Samstundis kann útleigarin heldur ikki fáa afturgoldið mvg av útreiðslum, sum viðvíkja útleigaðu ognini. Hetta er galdandi uttan mun til um útleigarin annars rekur mvg-skyldugt virksemi.

Sum føst ogn verður roknað bæði heilir bygningar og einstøk høli. Lendi av ymiskum slag, so sum havnarlag og landbúnaðarjørð verður eisini roknað sum føst ogn, og er útleigan av tílíkum ognum tískil eisini undantikin avgjaldsskyldu.


Sjálvboðin skráseting

Útleigari av fastari ogn kann søkja Toll- og Skattstovuna um at verða sjálvboðin skrásettur fyri mvg av leiguni. Treytin fyri sjálvbodnari skráseting er, at talan er um útleigan av fastari ogn til vinnuliga nýtslu hjá skrásetingarskyldugum virki. Við øðrum orðum er tað sostatt leigarin, sum skal nýta føstu ognina til mvg-skyldugt virksemi.

Henda treyt viðførir m.a., at útleigan av fastari ogn til peningastovnar, tryggingarfeløg, skúlar, ítróttarfeløg, læknar, tannlæknar og almennar stovnar annars ikki kann verða skrásett fyri mvg, av tí at hesi ikki reka mvg-skyldugt virksemi. Sjálvboðin skráseting kann heldur ikki fevna um útleigu til bústaðarendamál.

Útleigari, sum er sjálvboðin skrásettur fyri útleigan av fastari ogn, skal áleggja 25% í mvg á leiguna, og kann samstundis eisini fáa endurgoldið mvg av útreiðslum, sum viðvíkja útleigaðu ognini. Leigarin av ognini fær endurgoldið mvg av leiguni eftir vanligu reglunum í meirvirðisgjaldslógini.

Sjálvboðin skráseting skal fevna um eitt tíðarskeið, ið er í minsta lagi 2 ár at rokna frá tí degi, tá ið virkið varð skrásett.


Bygging til útleigu

Tá ið farið verður undir at byggja ella umbyggja fasta ogn til útleigu, kann útleigarin fáa endurgoldið mvg av byggikostnaðinum meðan byggingin fer fram. Treytin er tó, at Toll- og Skattstovan góðkennir eina váttan frá útleigaranum um, at útleiganin av ognini eftirfylgjandi verður fevnd av einari sjálvbodnari skráseting.

Í seinasta lagi 6 mánaðir aftaná, at fasta ognin er klár at taka í nýtslu, skal endalig útrokning gerast av tí mvg upphædd, sum útleigarin kann fáa endurgoldið av byggingini. Henda útrokning verður gjørd grundað á veruligu nýtsluna av føstu ognini, eftir at hon er klár at taka í nýtslu.


Umsókn skal sendast til Toll- og Skattstovuna

Tá ið søkt verður um sjálvbodna skráseting, skal serligt oyðublað nýtast, sum kann fáast frá Toll- og Skattstovuni. Saman við oyðublaðnum skal umsøkjari viðleggja avrit av leigusáttmála umframt tekning, sum vísir hvussu stórur partur av ognini verður útleigaður. Umsókn um sjálvbodna skráseting skal sendast Toll- og Skattstovuni fyri hvørja fasta ogn sær.

Sjálvboðin skráseting kann ikki fevna um áður gjørdar leigusáttmálar uttan so, at leigarin játtar hesum. Um føst ogn, sum er umfatað av sjálvbodnari skráseting, verður seld, skal keyparin sjálvur søkja Toll- og Skattstovuna um sjálvbodna skráseting av nýggjum, og skal leigarin av ognini tá eisini játta hesum.

Fleiri upplýsingar fáast við at venda sær til grannskoðaran, sum tú vanliga hevur samband við, ella

Mirjam Haraldsen
Tlf. nr. 34 34 70
mharaldsen@spekt.fo

Jákup Jacobsen
Tlf. nr. 34 34 63
jjacobsen@spekt.fo