Nýggjur statsautoriseraður revisor hjá SPEKT

Jóhannes Færø, statsautoriseraður revisor, er settur í starv hjá SPEKT. Jóhannes Færø, sum er 30 ára gamal, hevur seinastu 7 árini arbeitt sum grannskoðari hjá donsku grannskoðanar-fyritøkuni PwC, og í november síðsta ár stóð hann endaligu royndina at gerast statsautoriseraður revisor.

Jóhannes Færø byrjar hjá SPEKT hin 1. apríl 2010.

Hjá SPEKT starvast sostatt 3 statsautoriseraðir revisorar og 1 løggildur grannskoðari. Teir statsautoriseraðu revisorarnir eru Jóhannes Færø, Mirjam Haraldsen og Finnbjørn Zachariasen, meðan Annfinn Simonsen er løggildur grannskoðari.

Hjá felagnum eru harumframt fleiri starvsfólk við cand.merc.aud.-útbúgving (teoretiska útbúgvingin at gerast statsautoriseraður revisor), fleiri við HD-útbúgving, ið eru ávegis at gerast kandidatar, umframt fleiri, sum eru í gongd við HD-útbúgvingina.

SPEKT er sostatt væl fyri fakliga at taka av teimum avbjóðingum, sum verða settar eini grannskoðanarfyritøku í dag.