Nýggj ársroknskaparlóg frá 1. januar 2008

Nýggja ársroknskaparlógin inniheldur broyttar reglur á fleiri økjum. Broytingarnar eru tó í stóran mun bert galdandi fyri miðalstór og stór feløg, meðan færri broytingar eru í reglunum fyri smærri feløg.

Tann 1. januar 2008 varð nýggj ársroknskaparlóg sett í gildi í Føroyum, og er hon galdandi fyri roknskaparár, sum byrja 1. januar 2008 ella seinni. Hetta merkir, at ársroknskapurin fyri 2007 skal gerast eftir "gomlu" lógini, meðan ársroknskapurin fyri 2008 skal gerast eftir "nýggju" lógini.

Nýggja ársroknskaparlógin gevur m.a. loyvi til, at føroysk feløg, í staðin fyri at nýta reglurnar í ársroknskaparlógini, kunnu avleggja sínar roknskapir eftir altjóða rokn-skaparstandardum, teimum sokallaðu IFRS-standardum.

Við nýggju ársroknskaparlógini koma roknskaparkrøvini í Føroyum at líkjast krøv-unum í okkara grannalondum.

Í nýggju lógini verða feløg flokkað í bólkar eftir stødd, soleiðis at tess størri feløgini eru tess strangari lógarkrøvum skulu tey fylgja. Verður sæð burtur frá børs-skrásettum og statsligum feløgum verða smáparta- og partafeløg flokkað í 3 bólkar B, C-miðal og C-stór.

Feløg koma í tann bólkin har tey uppfylla 2 av niðanfyristandandi mørkum:

Lógarkrøvini til feløg í bólki C eru munandi strangari enn krøvini til feløg í bólki B, meðan munurin á lógarkrøvunum til feløg í bólki C-miðal og bólki C-stór er lítil.



Nakrar lógarbroytingar krevja, at verandi skrásetingar felagsins mugu sundurgreinast meira enn nú, meðan aðrar krevja, at nýggjar upplýsingar mugu skrásetast.

• Sum dømi uppá tað fyrra kann nevnast, at feløg í bólki C-stór í 2008 skulu sundurgreina søluna í virkisøki (segmentir). Skal hetta vera gjørligt er neyðugt, at felagið longu nú ger sær greitt, hvørji virkisøki felagið hevur, soleiðis at sølan longu frá 1. januar 2008 kann sundurgreinast, og at skrásetingarskipanir verða tillagaðar.
• Eitt annað dømi uppá tað fyrra kann nevnast, at feløg í bólki C í 2008 í størri mun enn nú skulu geva upplýsingar um samhandil við nærstandandi partar. Skal hetta verða gjørligt, er neyðugt, at felagið longu nú ger sær greitt, hvør skal roknast fyri at vera nærstandandi partur, soleiðis at felagið longu frá 1. januar 2008 kann skráseta samhandil við hesi fyri seg.
• Sum dømi uppá tað seinna kann nevnast, at feløg í bólki C í ársfrágreiðingini skulu geva eina frágreiðing um vitanartilfeingið hjá felagnum, um vitanartilfeingið hevur stóran týdning fyri felagið. Hetta krevur, at allar fyritøkur í bólki C taka støðu til spurningin: hevur vitanartilfeingið stóran týdning fyri felagið? Er svarið ja, má felagið taka støðu til spurningarnar: hvat vitanartilfeingið talan er um? og hvussu skal vitanartilfeingið lýsast í roknskapinum?

Umframt nevndu dømi krevja eisini aðrar lógarbroytingar, at skrásetingar-skipanir hjá fleiri feløgum mugu broytast longu frá 1. januar 2008 at rokna.

Eftir okkara tykki, verða tað fyrst og fremst feløg í bólki C, sum verða noydd at broyta skrásetingarskipanir v.m. Feløg í bólki B verða eisini í ávísan mun noydd at gera tillagingar í roknskapinum, men hesar tillagingar kunnu í flestu førum gerast í sambandi við gerð av ársroknskapinum fyri 2008 og krevja ikki umfatandi broytingar í skrásetingunum.

Eftir okkara tykki eiga tó øll feløg longu nú at seta seg inn í, hvønn týdning broytingarnar í nýggju ársroknskaparlógini koma at hava á teirra roknskap og í tann mun tað er neyðugt at broyta skrásetingarskipanir felagins.