Leiga arbeiðsfólk til Føroyar
Føroyskur arbeiðsgevari, sum leigar útlendsk arbeiðsfólk til at arbeiða í Føroyum, skal ávísa lønarinntøkuna hjá arbeiðsfólkunum um A-skattaskipanina, umframt at hann í ávísum førum eisini skal gjalda meirvirðisgjald til TAKS av leigugjøldunum fyri arbeiðsfólkið.
Skattskylda hjá arbeiðsfólkunum
Útlendsk starvsfólk, sum verða leigað til Føroyar at arbeiða fyri føroyskan arbeiðsgevara, eru skattskyldug í Føroyum frá fyrsta degi. Skattskyldan í Føroyum er galdandi fyri arbeiðsfólk frá øllum londum, uttan mun til um Føroyar hava tvískattasáttmála við viðkomandi land ella ikki.
Útlendsk starvsfólk, sum verða leigað til Føroyar at arbeiða, skulu skrásetast í fyribilsskattaskránni hjá TAKS, soleiðis at tey kunnu gjalda rættan skatt í Føroyum. Í hesum sambandi kunnu útlendsk arbeiðsfólk, sum bert skulu uppihalda sær í Føroyum í styttri tíðarskeið, fáa eitt fyribils p-tal frá TAKS.
Útlendsk starvsfólk sum uppihalda sær í Føroyum í minni enn 180 dagar innanfyri eitt 12 mánaða tíðarskeið, verða skattað í Føroyum sum avmarkað skattskyldug, og skulu gjalda 42% í skatti av lønarinntøkuni. Harafturat skulu tey eisini gjalda 1,75% av lønini í arbeiðsmarknaðargjaldi. Útlendsk arbeiðsfólk, sum uppihalda sær í Føroyum í minni enn 180 dagar, verða ikki skattað í Føroyum av fríari ferð og fríum bústaði.
Útlendsk starvsfólk sum uppihalda sær í Føroyum í meira enn 180 dagar innanfyri eitt 12 mánaða tíðarskeið, verða skattað í Føroyum sum fult skattskyldug, og skulu umframt skatt eisini gjalda til arbeiðsmarknaðareftirlønargrunnin, arbeiðsloysis-skipanina og til barsilsgrunnin. Hjá útlendskum starvsfólkum, sum uppihalda sær í Føroyum í meira enn 180 dagar, verður virðið av fríari ferð og fríum bústaði roknað sum skattskyldug inntøka.
Skyldur hjá føroyska arbeiðsgevaranum
Tá ið føroyskur arbeiðsgevari leigar starvsfólk til at arbeiða í Føroyum, er tað føroyski arbeiðsgevarin, sum hevur skyldu til at avrokna lønina hjá starvsfólkunum um A-skattaskipanina. Tað ber sostatt ikki til at avtala, at føroyski arbeiðsgevarin bert rindar eitt leigugjald til útlendska vikarstovu, uttan at taka hædd fyri, at A-skattur og onnur gjøld skulu eftirhaldast í Føroyum av lønini hjá arbeiðsfólkunum.
Føroyskur arbeiðsgevari, sum leigar útlendsk arbeiðsfólk, hevur somuleiðis skyldu at gjalda til arbeiðsmarknaðareftirlønargrunnin, arbeiðsloysisskipanina og til barsilsgrunnin.
Skattur og onnur gjøld, sum arbeiðsgevari og løntakari skulu gjalda, eru víst í niðanfyristandandi talvu. Prosent satsirnir í talvuni eru treytaðir av, at talan er um starvsfólk, sum arbeiða á landi og sum uppihalda sær í Føroyum í minni enn 180 dagar innanfyri eitt 12 mánaða tíðarskeið.
Starvsfólk Arbeiðsgevari
Skattur 42,00% -
AM-gjald 1,75% 1,75%
ALS-gjald 0,00% 1,00%
Barsilsgjald 0,00% 0,62%
Til samans 43,75% 3,37%
MVG í sambandi við leigan av arbeiðsfólki
Tænastur hjá útlendskari vikarstovu eru sum útgangsstøði mvg skyldugar í Føroyum sambært mvg-lógini. Men samstundis er eisini ásett í mvg-lógini, at um útlendsk vikarstova útleigar arbeiðsfólk til føroyskan arbeiðsgevara, sum hevur fullan frádráttarrætt fyri mvg, skal einki avgjald leggjast á leiguna.
Um útlendsk vikarstova útleigar arbeiðsfólk til føroyskan arbeiðsgevara, sum ikki er mvg-skrásettur, er tað føroyski arbeiðsgevarin, sum hevur skyldu til at gjalda meirvirðisgjaldið til TAKS. Meirvirðisgjaldið skal gjaldast til TAKS í seinasta lagi 10 dagar eftir at tænastan er móttikin.
Útlendsk vikarstova skal sostatt ikki sjálv áleggja mvg á leigugjøld í sambandi við útleigan av arbeiðsfólki til føroyskar arbeiðsgevarar. Útlendskar vikarstovur hava tískil heldur ikki skyldu til at mvg skráseta seg í Føroyum.
Fleiri upplýsingar fáast við at venda sær til grannskoðaran, sum tú vanliga hevur samband við, ella
Mirjam Haraldsen
Tlf. nr. 34 34 70
mharaldsen@spekt.fo
Jákup Jacobsen
Tlf. nr. 34 34 63
jjacobsen@spekt.fo