Frádráttur fyri MVG í sambandi við keyp av bili

Frádráttarrætturin fyri mvg í sambandi við keyp av bili er tengdur at, hvat bilurin verður nýttur til, og um talan er um keyp av nýggjum ella brúktum bili.

Keyp av bili hjá ikki mvg-skrásettum persónum, virkjum o.ø.
Persónar og fyritøkur, sum ikki eru mvg-skrásett, hava ikki frádráttarrætt fyri mvg í sambandi við keyp av bili. Kommunur og kommunalir stovnar kunnu fáa endurgoldið 75% av mvg útreiðsluni í sambandi við keyp av bili til nýtslu hjá kommununi ella kommunala stovninum. Hjá almennum stovnum verða mvg útreiðslurnar útjavnaðar soleiðis, at tær ikki ávirka játtanina hjá stovnunum á fíggjarlógini.

Keyp av nýggjum bili hjá mvg-skrásettum virki
Mvg-skrásett virki, sum keypir nýggjan bil at nýta burturav í sambandi við mvg-skyldugt virksemi, hevur frádráttarrætt fyri mvg-útreiðsluna í tí ársfjórðingi, tá ið avgjaldið er fakturerað virkinum. Verður tílíkur bilur eisini nýttur til onnur endamál, t.d. privat endamál ella í sambandi við ikki mvg-skyldugt virksemi, fær virkið ikki frádrátt fyri mvg, hvørki heilt ella lutvíst.

Frádrátturin fyri mvg í sambandi við keyp av bili er treytaður av, at virkið hevur mvg-skylduga sølu upp á minst 20.000 kr. árliga, umframt at tað eisini er ein treyt fyri frádrátti, at seljarin av bilinum hevur álagt mvg á søluna í tráð við reglurnar í mvg-lógini.

Keyp av brúktum bili hjá mvg-skrásettum virki
Tá ið mvg-skrásett virki keypir brúktan bil frá bilasølu, kann bilasølan í ávísum førum velja at selja bilin mvg frítt. Í tílíkum førum verður einki mvg fakturerað keyparanum, og keyparin av bilinum kann tískil heldur ikki fáa frádrátt fyri mvg, hetta hóast keyparin er eitt mvg-skrásett virki, og burturav skal nýta bilin í sambandi við mvg skyldugt virksemi. Bilasøla kann bert velja at selja brúktan bil uttan mvg, um bilasølan sjálv hevur keypt bilin mvg-frítt.

Um bilasøla harafturímóti velur at selja brúktan bil við mvg, skal mvg áleggjast á alla søluupphæddina, og ikki bert á vinningin av søluni. Mvg-skrásett virki, sum keypir brúktan bil frá bilasølu við mvg, hevur rætt til frádrátt fyri mvg útreiðsluna, um bilurin burturav verður nýttur til mvg-skyldugt virksemi.

Keyp av bili sum liður í yvirtøku av virki
Keyp av bili sum liður í yvirtøku av øðrum virki, ella parti av øðrum virki, er mvg-frítt. Um seljarin í tílíkum førum hóast alt áleggur mvg á søluupphæddina, hevur keyparin framvegis ikki rætt til frádrátt fyri mvg útreiðsluna, av tí at talan ikki er um mvg í tráð við mvg-lóginia.

Tað hevur týdning, at seljari og keypari gera sær greitt, at tá ið talan er um yvirtøku av virki, kunnu partarnir ikki sjálvir avtala, at sølan av ognunum, herundir bilum, skal verða við mvg. Yvirtøka av virki er mvg-frí sambært mvg-lógini, og kann keyparin av virkinum tískil undir ongum umstøðum fáa frádrátt fyri møguliga mvg-útreiðslu.

Tá ið bilur verður keyptur sum liður í yvirtøku av virki, kann tað koma fyri, at seljarin av bilinum skal javna fyri áður frádrigið íløgu mvg. Hetta er galdandi, um bilurin hevur verið ogn seljarans í minni enn 5 ár. Í tílíkum førum kann keyparin av bilinum tó yvirtaka javningarskylduna frá seljaranum. Treytin fyri at yvirtaka javningarskylduna er, at keyparin av bilinum hevur minst sama frádráttarrætt fyri mvg sum seljarin, og at keyparin á serligum skjali váttar, at hann hevur yvirtikið javningarskylduna. Yvirtøka av javningarskyldu er bert møgulig, tá ið talan er um yvirtøku av virki, og ikki í sambandi við vanligt keyp av rakstrargøgnum.