Ferðaútreiðslur í sambandi við arbeiði uttanlands

Eystari Landsrættur og Skatta- og Avgjaldskærunevndin hava í tveimum ymiskum málum tikið avgerðir, sum hava stóran týdning fyri skattligu viðgerðina av ferðaútreiðslum í sambandi við arbeiði uttanlands ella við útlendskum skipi.

Avgerð hjá Skatta- og Avgjaldskærunevndini
Skatta- og Avgjaldskærunevndin hevur í avgerð tann 5. oktober 2007 staðfest avgerð hjá TAKS um, at virðið av fríum ferðum millum heim og arbeiðsstað hjá persónum, sum arbeiða uttanlands, skal roknast sum skattskyldug inntøka.

Í umrødda máli er upplýst, at talan er um persón, sum arbeiðir fyri útlendskan arbeiðsgevara, og at arbeiðsgevarin rindar fyri ferðirnar millum Føroyar og útlendska arbeiðsplássið.

Skatta- og Avgjaldskærunevndin kemur til ta niðurstøðu, at í skattahøpi verður ferðing millum heim og arbeiðspláss altíð mett sum ein privat uppgáva, sum løntakarin sjálvur skal rinda fyri. Skatta- og Avgjaldskærunevndin staðfestir síðani, at tá ið løntakarin ikki hevur goldið ferðaútreiðslurnar sjálvur, er virðið av fríu ferðunum at rokna sum skattskyldug inntøka sambært § 25 í skattalógini.

Dómur hjá Eystara Landsrætti
Í dómi hjá Eystara Landsrætti tann 13. mars 2008 varð staðfest, at eftir § 33, stk. 12 í skattalógini hevur ein og hvør persónur, sum arbeiðir uttanlands, ella siglir við útlendskum skipi, rætt til samdøgursfrádrátt uppá 300 kr. um dagin, uttan mun til um viðkomandi persónur hevur útreiðslur ella ikki í sambandi við hetta arbeiði.

Frádrátturin er tó treytaður av, at løntakarin hevur arbeitt uttanlands ella umborð á útlendskum skipi í antin 2 mánaðir uttan slit ella í 100 samdøgur innanfyri eitt 12 mánaðar tíðarskeið.

Hvørja ávirkan hava hesar avgerðir
Avgerðirnar hjá Landsrættinum og Skatta- og Avgjaldskærunevndini viðføra, at persónur, sum arbeiðir uttanlands, ella sum er við útlendskum skipi, á hvørjum ári skal kunna skjalprógva, at hann sjálvur hevur goldið fyri ferðaútreiðslur. Verður hetta ikki gjørt, kann viðkomandi persónur verða skattaður av virðinum av fríari ferðing.

Niðanfyri eru víst dømi uppá hvussu skattskylduga inntøkan kann uppgerast, alt eftir í hvønn mun løntakari sjálvur hevur goldið fyri ferðaútreiðslur.

Persónar, sum sigla uttanlands við føroyskum skipum, hava ikki rætt til samdøgursfrádrátt. Í tann mun, sum hesir persónar fáa ferðaútreiðslur goldnar av arbeiðsgevaranum, verður virðið av hesum útreiðslum lagt afturat skattskyldugu inntøkuni.

Serregla fyri persónar undir DIS-skipanini
Persónar, sum sigla við skipum undir DIS-skipanini, skulu ikki skattast av virðinum av fríari ferðing. Hetta kemst av, at Føroyar og Danmark hava gjørt eina seravtalu til norðurlendska tvískattasáttmálan, sum m.a. viðførir, at Føroyar ikki hava rætt til at skatta løn ella lønarískoyti, sum verður goldið løntakara undir DIS-skipanini, íroknað fríar ferðir.

Henda serregla er bert galdandi fyri persónar undir DIS-skipanini. Persónar, sum sigla við øðrum útlendskum skipum, skulu framvegis skattast av virðinum av fríum ferðum.

Serregla fyri persónar, sum ferðast uttanlands í arbeiðsørindum
Persónar, sum ferðast uttanlands í arbeiðsørindum, hava rætt til at fáa ferðaútreiðslur endurgoldnar skattafrítt frá arbeiðsgevaranum. Hetta merkir, at hesir persónar ikki skulu skattast av fríum ferðum.

Sambært kunning frá TAKS skal persónur vanliga vera í føstum starvi, fáa fasta løn, hava fastan arbeiðsstað og vera burtur aðrastaðni í arbeiðsørindum frá fasta arbeiðsstaðnum fyri at verða fevndur av hesari frítøku. Fastur arbeiðsstaður er t.d. kontór, bygningur, verkstaður ella líknandi – t.v.s. ein staður, har ið starvsfólk halda til dagliga. Starvsfólk, sum hava skiftandi arbeiðsstøð, og sum ferðast til hesi skiftandi arbeiðsstøð, verða ikki mett at ferðast í arbeiðsørinum, og skulu tískil skattast av fríum ferðum.

Hetta merkir m.a., at persónar við útlendskum skipum, og persónar, sum arbeiða uttanlands í byggivinnuni, ikki eru fevndir av hesari frítøku, og skulu tískil skattast av virðinum av fríari ferð sum omanfyri greitt frá.

Fleiri upplýsingar kunnu fáast við at venda sær til:

Mirjam Haraldsen
Tlf. nr. 34 34 70
mharaldsen@spekt.fo

Jákup Jacobsen
Tlf. nr. 34 34 63
jjacobsen@spekt.fo