Dagpengar í sambandi við arbeiði í Danmark
Toll- og Skattstovan hevur í rundskrivi fráboðað broytingar viðvíkjandi útgjalding av skattafríari dag- og náttarviðbót í sambandi við arbeiðið í Danmark.
Dag- og náttarviðbót
Dag- og náttarviðbót er skattafrítt endurgjald, sum arbeiðsgevarar kunnu gjalda løntakaraum, sum ferðast uttanlands í arbeiðsørindum. Viðbótin er ætlað at gjalda fyri útreiðslur til kost og innivist.
Eftir higartil galdandi reglum hava løntakarar, sum eru sendir til Danmark í arbeiðsørindum, kunnað fingið tilsamans 610 kr. í viðbót um dagin teir fyrstu 28 dagarnar. Aftaná 28 dagar hava løntakarar havt rætt til 45% av tilskilaðu viðbótini, ella 274,50 kr. um dagin.
Broyting í 28 daga regluni
Í nýggja rundskrivinum frá Toll- og Skattstovuni er ásett, at fyrstu 28 dagarnir kann løntakarin fáa 610 kr. um dagin í dag- og náttarviðbót. Aftaná 28 dagar skal avtala vera gjørd um viðbót í hvørjum einstøkum føri. Rundskrivið ásetur ikki nærri krøv til tílíkar avtalur, herundir hvussu stóra upphædd arbeiðsgevari og løntakari kunnu avtala at útgjalda fyri hvønn dag aftaná fyrstu 28 dagarnar.
Tó má roknast við, at tað ikki verður góðtikið, at arbeiðsgevari og løntakari avtala at útgjalda hægri upphædd enn 610 kr. aftaná fyrstu 28 dagarnar. Tað er ógreitt um arbeiðsgevari og løntakari kunnu avtala at halda á fram við at útgjalda 610 kr. í viðbót aftaná fyrstu 28 dagarnar uttan nærri grundgeving. Rundskrivið inniheldur ongar ásetingar hesum viðvíkjandi, og enn finst eingin siðvenja á økinum.
Broytingin í 28 daga regluni viðførir tó, at arbeiðsgevarar nú sleppa undan at senda teirra løntakarar heim til Føroyar aftaná 28 dagar, fyri at teir síðani kunnu byrja uppá eitt nýtt 28 daga tíðarskeið, tá ið aftur verið farið uttanlands.
Skal ferðast uttanlands í arbeiðsørindum
Í rundskrivinum frá Toll- og Skattstovuni er ásett, at persónar hava rætt til skattafría dag- og náttarviðbót um teir ferðast uttanlands í arbeiðsørindum. Hugtakið at "ferðast uttanlands í arbeiðsørindum" er ikki nærri greinað, og tí er enn ógreitt, hvussu hetta skal skiljast, herundir um ásetingarnar í rundskrivinum umfata øll tey, sum arbeiða uttanlands, ella um talan bert er um persónar, sum verða sendir uttanlands í arbeiðsørindum frá teirra føroyska arbeiðsplássi.
Viðbótin skal gjaldast afturat lønini
Dag- og náttarviðbótin má ikki innihalda samsýning fyri vinnu. Hetta merkir, at arbeiðsgevari ikki kann útgjalda løn ella part av lønini sum dag- og náttarviðbót. Dag- og náttarviðbótin skal tí gjaldast afturat vanligu lønini. Talan er um eina verndarreglu, sum skal forða fyri, at skattafrí dag- og náttarviðbót verður mótroknað í skattskyldugari løn.
Dømi:
Skeivt Rætt
Tímaløn fyri eina viku 40t * 130 kr. 5.200 5.200
Dag- og náttarviðbót 5 d * 610 kr. 3.050 3.050
Skattskyldug inntøka 2.150 5.200
Um dag- og náttarviðbótin verður frádrigin í skattskyldugu inntøkuni, kemur skattskylduga tímalønin niður á 53,75 kr. (2.150 / 40t). Tá ið hetta er nógv lægri enn vanligar tímalønir á føroyska arbeiðsmarknaðinum, kann tað skjótt staðfestast, at dag- og náttarviðbótin er útgoldin sum partur av lønini.
Tað er sostatt ein treyt, at løntakarar, sum móttaka dag- og náttarviðbót, frammanundan fáa útgoldið eina løn, sum liggur á einum støði, sum er vanligt innanfyri viðkomandi starvsgrein.
Møgulig skattskylda í Danmark
Umrødda dag- og náttarviðbót í rundskrivinum hjá Toll- og Skattstovuni er sum útgangsstøði bert skattafrí í Føroyum. Um føroyskur løntakari verður skattskyldugur í Danmark, kann føroyska dag- og náttarviðbótin verða tikin við í skattskyldugu inntøkuna í Danmark.
Tað eru fyrst og fremst ásetingarnar í norðurlendska tvískattasáttmálanum sum gera av, um føroyskir løntakarar skulu gjalda skatt í Danmark ella ikki. Arbeiðsgevarar og løntakarar eiga tí at kunna seg um reglur hesum viðvíkjandi, áðrenn farið verður uttanlands at arbeiða.
Fleiri upplýsingar fáast við at venda sær til grannskoðaran, sum tú vanliga hevur samband við, ella
Mirjam Haraldsen
Tlf. nr. 34 34 70
mharaldsen@spekt.fo
Jákup Jacobsen
Tlf. nr. 34 34 63
jjacobsen@spekt.fo