Dagføring av vinnufelagslóggávuni

Í 2007 varð samtykt at gera eina víttfevnandi dagføring av vinnufelagslóggávuni í Føroyum og broyttu lógirnar komu í gildi 1. januar 2008.

Seinasta týðandi dagføringin av vinnufelagslóggávuni varð gjørd í 1993, og eru stórt sæð ongar broytingar hendar í tíðarskeiðnum fram til 1. januar 2008.

Tann 1. januar 2008 varð málsøkið vinnufelagsrættur yvirtikið og er nú føroyskt málsøki. Málsøkið viðvíkjandi grannskoðan varð tó yvirtikið í 1992.

Dagførdu lógirnar svara neyvt til galdandi danskar lógir og er vinnufelagslóggávan nú í høvuðsheitum í samsvari við lóggávuna í okkara grannalondum.

Einsháttaðar reglur hava m.a. tann fyrimun við sær, at føroysk feløg hava somu skyldur og rættindi sum kappingarneytar teirra í grannalondunum. Roknast má eisini við, at tá feløg kenna tær grundleggjandi "spælireglurnar", so er lættari hjá teimum at virka og samstarva tvørtur um landamørk.

Heilt stutt um dagførdu lógirnar:


Ársroknskaparlógin

Ársroknskaparlógin er munandi broytt bæði í bygnaði og í innihaldi. Lógin viðførir broyttar reglur á fleiri økjum. Broytingarnar eru tó í stóran mun bert galdandi fyri miðalstór og stór feløg, meðan færri broytingar eru í reglunum fyri smærri feløg.

Smá feløg eru feløg, sum uppfylla tvey av niðanfyri standandi mørkum:

Nettosøla < 58 mió.kr.
Ogn til samans < 29 mió.kr.
Starvsfólkatal < 50 starvsfólk


Partafelagslógin

Í partafelagslógini eru nakrar størri og nógvar smærri broytingar gjørdar. Skráseting Føroya hevur gjørt eitt yvirlit yvir broytingarnar í nýggju partafelagslógini í mun til ta gomlu. Avrit av hesum yvirliti kann síggjast her.

Nevnast kann, at nýggja lógin víðkar um møguleikarnar fyri at útluta vinningsbýti. Eftir gomlu lógini var bara møguligt at útluta vinningsbýti á ársaðalfundinum, har ársroknskapurin varð góðkendur. Nýggja lógin gevur, undir ávísum treytum, møguleika fyri at útluta vinningsbýti aðrar tíðir.


Smápartafelagslógin

Í smápartafelagslógini eru eisini nakrar størri og nógvar smærri broytingar gjørdar. Skráseting Føroya hevur gjørt eitt yvirlit yvir broytingarnar í nýggju smápartafelagslógini í mun til ta gomlu. Avrit av hesum yvirliti kann síggjast her.

Víðkanin av møguleikanum fyri at útluta vinningsbýti er eisini galdandi fyri smápartafeløg.

Harafturat kann nevnast, at kravið til smápartapening er hækkað úr 80.000 kr. til 125.000 kr. Kravið er galdandi fyri feløg, sum verða stovnað 1. januar 2008 ella seinni. Feløg, sum eru stovnað áðrenn 1. januar 2008, skulu hava hækkað smápartapeningin upp til 125.000 kr. í seinasta lagi í 2013.


Lóg um vinnurekandi grunnar

Í lóg um vinnurekandi grunnar eru fleiri broytingar gjørdar. M.a. eru tær serligu roknskaparásetingarnar, sum vóru í tí gomlu lógini um vinnurekandi grunnar, fluttar yvir í nýggju ársroknskaparlógina.


Lóg um "visse erhvervsdrivende virksomheder"

Talan er um eina nýggja lóg, sum stórt sæð fevnir um øll onnur vinnurekandi feløg enn smápartafeløg, partafeløg og vinnurekandi grunnar. Lógin kemur í staðin fyri m.a. gomlu firmalógina.

Sambært nýggju lógini skulu øll vinnurekandi feløg við avmarkaðari ábyrgd skrásetast hjá Skráseting Føroya.


Lóg um grannskoðan

Lógin um grannskoðan er broytt munandi bæði í bygnaði og innihaldi. Sum nakað nýtt eru reglurnar fyri løggildar og skrásettar grannskoðarar savnaðar í einari lóg.

Ein av týðandi broytingunum í lógini er tann, at lógin nú bert fevnir um viðurskifti, tá ið grannskoðarin gevur váttanir mótvegis triðjapersóni. Lógin er sostatt ikki longur galdandi, tá ið grannskoðarin veitir ráðgevingartænastur, har eingin váttan verður givin.

Lógin víðkar eisini munandi um møguleikarnar hjá løggildum grannskoðarum at fáast við annað virksemi enn grannskoðan.

Les meira viðvíkjandi vinnulógávuni her.