Kunning

Broytingar í meirvirðisavgjaldslógini (1)

Løgtingið samtykti hin 20. apríl 2005 nakrar broytingar til meirvirðisgjaldslógina. Broytingarnar snúgva seg í stuttum um avgjaldsskylduga virðið í sambandi við sølu av brúktum bátum og meirvirðisgjald av ávísum tænastum, ið verða keyptar í útlondum.


Søla av brúktum bátum
Lógarbroytingin hevur við sær, at framyvir verður einans vinningur við sølu av brúktum bátum undir 5 GT avgjaldsskyldugur. Við hesari broytingini kemur søla av brúktum bátum undir somu áseting, sum er galdandi fyri sølu av brúktum persónmotorakførum og av vøru- og lastmotorakførum.


Meirvirðisgjald av ávísum tænastum, ið verða keyptar í útlondum
Higartil hevur sambært kunngerð verið galdandi, at útlendsk virki skuldu lata seg meirvirðisgjaldsskráseta, um tey árliga seldu ávísar tænastur fyri yvir 20.000 kr. til keyparar í Føroyum, tá seldu tænasturnar vórðu nýttar í Føroyum.

Reglurnar á hesum øki eru nú settar beinleiðis í meirvirðisgjalds- lógina, samstundis sum nakrar broytingar eru gjørdar.

Útleiga av leysafæ
Viðvíkjandi útleigu av leysafæi er ein broyting farin fram sum hevur við sær, at útlendsk virki í øllum førum skulu lata seg meirvirðis- gjaldsskráseta, um útleigað verður í Føroyum fyri yvir 20.000 kr. árliga.

Higartil hevur annars verið galdandi, at meirvirðisgjaldsskráseting ikki hevur verið neyðug, um útleiganin fór fram til skrásett virki í Føroyum, sum kundu fáa afturrindað avgjaldið í síni heild.

Útlendsk virki, sum útleigað leysafæ í Føroyum og sum ikki higartil hava verið meirvirðisgjalds-skrásett, hava nú skyldu til at lata seg skráseta.


Fjarskiftistænastur og útbreiðsla av útvarps- og sjónvarpssendingum

Fjarskiftistænastur og útbreiðsla av útvarps- og sjónvarps- sendingum vóru ikki nevndar í kunngerðini, sum áður hevur verið galdandi. Við lógarbroytingini koma útlendsk virki, sum selja nevndu tænasturnar í Føroyum undir ásetingina um skyldu at lata seg meirvirðisgjalds-skráseta. Fyri hesar tænastur er talan sostatt um eina víðkan av avgjaldsskylduni.


Broyting í skrásetingarskyldu

Sambært nýggju lógargreinini skulu útlendsk virki ikki rinda avgjald av søluni av niðanfyri nevndu tænastum, tá selt verður til skrásett virkir í Føroyum, sum í síni heild kunnu rokna avgjaldið við í inngangandi avgjaldið.

  1. At avhenda heilt ella lutvíst upphavsrættindi, patentrættindi, lisensrættindi, rættindi til vørumerki, felagsmerki og mynstur, og onnur tílík rættindi.
  2. Tænastur viðvíkjandi reklamu.
  3. Tænastur frá ráðgevandi virkjum, verkfrøðingum, byggifrøðingum, advokatum og grannskoðarum og aðrar tílíkar tænastur; dátuviðgerð og fráboðan av upplýsingum.
  4. Tænastur frá vikarstovum.
  5. Skylda til heilt ella lutvíst at lata vera við at fremja vinnuligt virksemi ella gera nýtslu av einum av teimum í hesum stykki nevndu rættindum.
  6. Tænastur, ið verða gjørdar av millummonnum, sum handla í navni hjá øðrum og fyri rokning hjá øðrum.
  7. Tænastur viðvíkjandi fastari ogn her á landi, harímillum tænastur frá ognmeklara, ognarhandlara o.l. og byggifrøðiligar og ráðgevandi tænastur.
  8. Tiltøk v.m. innan ítrótt, undirhald, undirvísing og gransking v.m.
  9. Arbeiði framt á leysafæ her á landi.
  10. Serkøn virðismeting av leysafæi her á landi.
  11. Fjarskiftistænastur.
  12. Útbreiðsla av útvarps- og sjónvarpssendingum.

Ein líknandi áseting var eisini í teirri higartil galdandi kunngerðini, men samstundis var í aðrari grein ásett, at útlendsk virki tó í øllum førum skuldu lata seg meirvirðisgjaldsskráseta, tá talan var um sølu av tænastum, sum eru nevndar í 7 –10, um árliga sølan var meira enn 20.000 kr.

Henda síðst umrødda greinin í áður galdandi kunngerðini er ikki við framdu lógarbroytingini sett inn í meirvirðisgjaldslógina. Tískil er avgjaldsskyldan hjá útlendskum virkjum viðvíkjandi tænastunum, nevndar í 7 – 10, avmarkað til bert at fevna um sølu til keyparar í Føroyum, sum ikki í síni heild kunnu fáa avgjaldið afturrindað.

Fleiri upplýsingar fáast við at venda sær til grannskoðaran, sum tú vanliga hevur samband við, ella


Mirjam Haraldsen
Tlf. nr. 34 34 70
mharaldsen@spekt.fo