Afturgjalding av eykaskrásetingargjaldi á bilum
Vinnurekandi kunnu eftir umsókn fáa afturgoldið eykaskrásetingargjaldið, sum verður goldið til landskassan í sambandi við keyp av nýggjum bilum.
Eykagjald í staðin fyri meirvirðisgjald
Frá 1. mai 1999 til 27. apríl 2005 rindaðu bileigarar meirvirðisgjald av samlaða søluprísinum á nýggjum bili, herundir eisini meirvirðisgjald av skrásetingargjaldinum. Niðanfyri er víst dømi um hvussu meirvirðisgjaldið varð útroknað í hesum tíðarskeiði.
CIF virðið føroyska havn 100.000
Skrásetingargjald 57.500
Vinningur hjá bilasølu 30.000
MVG (25% av 187.500) 46.875
Søluprísur 234.375
Galdandi frá 27. apríl 2005 eru reglurnar broyttar soleiðis, at í staðin fyri meirvirðisgjald skal eitt eykagjald, svarandi 25% av vanliga skrásetingargjaldinum, gjaldast í sambandi við skráseting av nýggjum bilum. Niðanfyri er víst dømi um hvussu meirvirðisgjaldið og eykagjaldið nú verða útroknað.
CIF virðið føroyska havn 100.000
Vinningur hjá bilasølu 30.000
MVG (25% av 130.000) 32.500
Skrásetingargjald 57.500
Eykagjald (25% av 57.500) 14.375
Søluprísur 234.375
Hvør skal gjalda eykagjald
Eykagjald skal gjaldast landskassanum saman við vanliga skrásetingargjaldinum, áðrenn nýggjur bilur verður tikin í nýtslu. Eykagjaldið og vanliga skrásetingargjaldið áliggja keyparanum av bilinum, men vanligt er, at bilasølan átekur sær at rinda gjøldini til landskassan vegna bileigaran.
Eykagjald skal gjaldast landskassanum uttan mun til um bilurin verður keyptur av privatum ella vinnurekandi. Tó skal eykagjald ikki gjaldast fyri ávís sløg av bilum, so sum hýruvognar, skúlavognar, neyðsendaraakfør, líkvognar og ellisakfør. Harumframt verður eykagjald ikki goldið fyri bilar við eini totalvekt yvir 3.500 kg.
Vinnurekandi kunnu fáa eykagjaldið afturgoldið
Meirvirðisgjaldsskrásett virki, sum í síni heild hava rætt til frádrátt eftir meirvirðisgjalds lóggávuni, kunnu fáa eykagjaldið afturgoldið.
Fyri at fáa eykagjaldið afturgoldið skal umsókn sendast til Akstovuna. Umsóknar-blað liggur á heimasíðuni hjá Akstovuni www.akstovan.fo. Áðrenn eykagjaldið verður afturgoldið, biður Akstovan Toll- og Skattstovuna gera eina meting av, um virkið lýkur treytirnar fyri afturgjalding.
Tá ið nýggjur bilur verður keyptur, kemur ofta fyri, at eykagjaldið ikki er tilskilað á fakturanum frá bilasøluni. Hetta merkir tó ikki, at eykagjaldið ikki er íroknað í søluprísinum. Meirvirðisgjaldsskrásett virki eiga tí at søkja Akstovuna um at fáa eykagjaldið afturgoldið, hóast eykagjaldið ikki stendur á fakturanum frá bilasøluni.
Avgerð hjá kærunevndini
Skatta- og Avgjaldskærunevndin hevur tann 25. oktober 2006 tikið avgerð um, at útrokningin av meirvirðisgjaldinum í tíðarskeiðinum frá 1999 til 2005 ikki var í tráð við galdandi lóggávu. Avgerðin staðfestir, at tað ikki var heimild fyri at áleggja meirvirðisgjald á skrásetingargjaldið á nýggjum bilum. Enn er tó ikki boðað frá, hvussu umsóknir um afturgjalding av meirvirðisgjaldinum verða viðgjørdar. Privatir bileigarar, eins og virkir sum ikki hava fingið frádrátt fyri meirvirðisgjald av bilakeypi, eiga tí sum skjótast at taka neyðug stig til at fáa afturgoldið hendan partin av meirvirðisgjaldinum í sambandi við bilakeyp í tíðarskeiðinum frá 1 mai 1999 til 27. apríl 2005.
Toll- og Skattstovan hevur tó boðað frá, at málið er prinsipielt, og er avgerðin hjá kærunevndini tí løgd fyri Føroya Rætt.
Fleiri upplýsingar fáast við at venda sær til grannskoðaran, sum tú vanliga hevur samband við, ella
Mirjam Haraldsen
Tlf. nr. 34 34 70
mharaldsen@spekt.fo
Jákup Jacobsen
Tlf. nr. 34 34 63
jjacobsen@spekt.fo